Pinay Thrillseeker's Versatile Blogger Award

Salamat kay Rogie ng The Ignored Genius sa pagsama ng blog ko sa listahan niya ng pagbibigyan ng Versatile Blogger Award. Nakakatuwa ang kanyang paliwanag kung bakit kailangang subaybayan ang aking blog, at nakakatuwa dahil isa siya sa mga unang taong sumuporta dito. Nagsimula akong walang kakilala sa pagba-blog kaya naging malaking tulong ang kanyang suporta, pati na rin ang suporta ng lahat ng aking mga kaibigang nakadaupang-palad ko lamang sa internet.

At dahil Tagalog ang kanyang blog, naisipan kong gayahin at magsulat sa Tagalog. Ito ang kauna-unahang Tagalog na sulat ko dito. Pagpasensyahan na kung may mga mali, sadya lang talagang mula nung unang antas ay mailap na sa akin ang asignaturang Filipino. Hindi ko rin alam kung bakit, siguro ay dahil parang inaantok ako masilayan pa lamang sa malayo ang aking guro sa Filipino, kaya nadala ko na ito hanggang paglaki.

Paano nga ba nagiging versatile ang isang blogger? Paano nga ba matatawag na versatile ang isang tao? Siguro nga ay matatawag akong versatile sa kung anu-anong pinagsususulat ko dito - may drama, may comedy, may action, may love story. Ito nga pala ang pitong bagay tungkol sa akin. Ewan lang kung iisipin pa rin ni Rogie na versatile ako pagkabasa nito:

1. Mas nauna akong natutong magsalita kaysa maglakad, at natutunan ko agad kumanta noong matuto akong magsalita. Salamat sa tiyahin kong suki ng karaoke.

2. Malaking bahagi ng kasaysayan ko ang Max's SM North sapagkat noong ako ay apat na taon at di pa sanay magbasa, naiwanan ako ng aking tiyahin at pinsan doon sa laruang umiikot na malalaking tasa. Ako lamang mag-isa ngunit alam kong ang aking ina at iba pang mga tiyahin ay nandoon sa isang kainan na nakasulat ang pangalan sa kulay pula. Ang masama nga lamang noon, dalawang magkatabing kainan ang kulay pula ang pangalan, kaya't bilang hindi pa ako marunong magbasa, nanghula na lamang ako kung saan ako papasok. Buti na lang, tama yung pinasukan ko kung hindi, hindi ko na alam kung nasaan ako ngayon. Pagbalik ng tiyahin at pinsan ko, pareho silang namumutla at bilang kasabwat ko ang aking ina at iba pang mga tiyahin, itinago nila ako sa ilalim ng mesa para lalo silang takutin. :D

3. Consistent honor student ako, pero noong Grade 1 ako, napatawag ng guro ang aking mahal na ina sapagkat pakiramdam niya ay tinutulugan ko ang kanyang pagtuturo ng Filipino.

4. Nanalo akong Queen of the Night noong JS Prom namin. Oo, totoo yan. Bawal ang violent reaction.:D

5. Hindi ako marunong magbisikleta. Marami nang nagsubok magturo pero walang nagtagumpay.

6. Umaakyat ako ng bundok pero hindi ako marunong tumakbo at hindi ako interesado sa mga Fun Run kahit lahat na halos ng tao ay sumasali. Isang beses ko pa lang natapos takbuhin ang UP Acad Oval, at sobrang pilitan pa dahil natakot lang ako noong sabihin nilang uulit mula simula pag hindi nakatapos.

7. Ang limang bagay na ayokong mangyari sa akin/hindi ginagawa/pilit na iniiwasan: butiki (phobia talaga), seafood (allergic kasi), pagtayo sa biyahe sa bus, pagsakay ng MRT/LRT, at syempre, ang pagkakasakit (pero suki na ko ng mga doktor mula pagkabata at di na nagbago e).

Ngayon ay hayaan niyo akong pumili ng labinlimang taong karapat-dapat na pagpasahan nito (oo, labinlima talaga, nakasaad sa batas):

1. Jay ng Mga Kwento ni Pareng Jay

2. Paula ng Pondering Paodaolei
3. Mai ng Budget Biyahera
4. Regine ng Between Coordinates
5. Ric ng Life N Canvas
6. Violy ng Vivi's Random Ramblings
7. Ephraim ng The Adventist Adventurer
8. Mitch ng Round-Tripinay
9. Pa-ul ng Pa-ul
10. Claire ng The Secret Notebook
11. Prince Josh ng Kulapitot
12. Lalah ng Party of Three
13. Carmi ng Carmi's Caprice
14. Mimi ng Mimidora the Explorer
15. Arnold ng Lakwatserong Unggoy

Pamantayan: Pasalamatan at i-tag sa post ang naggawad ng parangal. Magbanggit ng pitong bagay tungkol sa sarili mo. Ipasa ang parangal sa labinlimang mahuhusay na blogger na iyong sinusubaybayan.

Para sa English version ng pamantayan kung paano gumawa ng iyong sariling The Versatile Blogger Award post, i-click lamang ang icon sa ilalim. Maraming salamat!